నటి ఆండ్రియా జెరెమియా ఒక పెద్ద సాహసం చేశారు. తన ఇంటిని గిరవు పెట్టి స్వయంగా నిర్మించిన ‘మాస్క్’ (Mask) సినిమా శుక్రవారం ప్రపంచవ్యాప్తంగా విడుదలైంది. ఈ విషయాన్ని ఆమె స్వయంగా మీడియాతో పంచుకున్నారు.
ఆండ్రియా మాట్లాడుతూ—
“ఇప్పటివరకు 35కి పైగా సినిమాల్లో నటించాను. ‘మాస్క్’ కథ నచ్చడంతోనే నిర్మాత చొక్కలింగంతో కలిసి ఈ సినిమా నిర్మించాలని నిర్ణయించుకున్నాను” అని తెలిపారు. “ఈ చిత్రానికి దర్శకుడు వెట్రిమారన్‌ నిర్మాత కాదు. అయితే ఆయన మా ప్రాజెక్టుకు మెంటర్‌లా వ్యవహరించారు. క్రియేటివ్ ప్రొడ్యూసర్‌ మాత్రమే” అని స్పష్టం చేశారు. తన ఇంటిపై రుణం తీసుకున్న విషయంపై ఆండ్రియా హృదయపూర్వకంగా మాట్లాడారు:
“ఎన్నేళ్లుగా శ్రమించి సంపాదించి ఒక ఇల్లు నిర్మించుకున్నాను. ఇప్పుడు ఆ ఇంటిని గిరవు పెట్టి ఈ సినిమా తీసాను. ఈ విషయం తెలిసిన చాలామంది నన్ను పిచ్చిదానిలా చూశారు. కానీ నా డబ్బుతో కట్టిన ఇంటిని నా కల నెరవేర్చడానికి ఉపయోగించుకోవడంలో ఎలాంటి తప్పూ లేదని నేను భావించాను” అని చెప్పారు.
అలాగే విడుదల కాని చిత్రాల గురించి బాధ వ్యక్తం చేశారు:
“నేను నటించిన ‘మనుషి’, ‘పిశాచి-2’ చిత్రాలు ఇప్పటికీ విడుదల కావడం లేదు. మరో సినిమా కూడా ఇదే పరిస్థితిలో ఉంది. ‘మాస్క్’ సక్సెస్ అయితే వచ్చే లాభాలతో ‘పిశాచి-2’ సినిమాను నేనే రిలీజ్ చేస్తాను” అని తెలిపారు. చివరిగా ఆమె సహనటుడు కవిన్‌ నటనపై ప్రశంసలు కురిపించారు: “మాస్క్ మూవీలో హీరో కవిన్‌ నటన అద్భుతంగా ఉంది” అని అన్నారు. సినిమాపై తన నమ్మకంతో, ఆండ్రియా చేసిన ఈ రిస్క్ ప్రస్తుతం సినీ రంగంలో చర్చనీయాంశంగా మారింది.
Related నమస్తే సోదరా Updates:
