న్యూ ఢిల్లీ, శుక్రవారం 28 : దేశ రాజధాని ఢిల్లీని కమ్మేసిన ఘోర వాయు కాలుష్యం విషయంలో ఏఐసీసీ అగ్రనేత రాహుల్ గాంధీ తీవ్ర ఆందోళన వ్యక్తం చేశారు. ఈ సందర్భంగా ఆయన విడుదల చేసిన వీడియో ప్రస్తుతం చర్చనీయాంశంగా మారింది. తాను కలిసిన ప్రతి ఒక్కరి నోటా ఢిల్లీలో పెరుగుతున్న పొల్యూషన్ గురించే వినిపిస్తోందని రాహుల్ పేర్కొన్నారు. తమ పిల్లలు విషపూరిత గాలి పీలుస్తూ పెరుగుతుండటంతో ప్రజలు అలసట, భయం, కోపంతో ఉన్నారని తెలిపారు. భారతదేశ భవిష్యత్తైన పిల్లలు కాలుష్యంతో ఉక్కిరిబిక్కిరి అవుతున్నా ప్రధానమంత్రి నరేంద్రమోదీ మౌనంగా ఎలా ఉండగలరని ప్రశ్నించారు.
మోదీ ప్రభుత్వంపై విమర్శలు
ఢిల్లీ పొల్యూషన్పై కేంద్రం ఏ చర్యలూ తీసుకోవటం లేదని రాహుల్ గాంధీ ధ్వజమెత్తారు. ఢిల్లీ వాయు కాలుష్య సమస్యను పరిష్కరించేందుకు మోదీ ప్రభుత్వానికి ఎలాంటి ప్రణాళిక లేదని, జవాబుదారీతనం పూర్తిగా లోపించిందని ఆయన విమర్శించారు. పార్లమెంటులో ఈ అత్యవసర సమస్యపై వెంటనే విస్తృతమైన చర్చ జరగాలని డిమాండ్ చేశారు.
తక్షణ చర్యల అవసరం
ప్రజల ఆరోగ్యం కోసం వెంటనే దృఢమైన చర్యలు తీసుకోవాలని కేంద్ర ప్రభుత్వాన్ని రాహుల్ కోరారు. ఢిల్లీ కాలుష్య సమస్యను సమర్థవంతంగా ఎదుర్కొనడానికి కేంద్ర–రాష్ట్ర ప్రభుత్వాలు కఠినమైన కార్యాచరణా ప్రణాళిక అమలు చేయాలని సూచించారు. “మన పిల్లలకు స్వచ్ఛమైన గాలి హక్కు. ప్రతిపక్షాలపై నిందలు మోపకుండా, వెంటనే చర్యలు చేపట్టాలి,” అని రాహుల్ గాంధీ స్పష్టం చేశారు. ఢిల్లీ వాయు కాలుష్య తీవ్రత ఇప్పటికే ప్రజల జీవనాన్ని ప్రభావితం చేస్తుండగా, రాహుల్ గాంధీ వ్యాఖ్యలు రాజకీయ వర్గాల్లో కొత్త చర్చకు దారితీశాయి.
సంబంధిత జాతీయ అప్డేట్స్:
