ఆంధ్రప్రదేశ్లో, ముఖ్యంగా ఉత్తరాంధ్ర జిల్లాల్లో స్క్రబ్ టైఫస్ వ్యాధి వేగంగా విస్తరిస్తూ ప్రజలను కలవరపెడుతోంది. గత వారం రోజుల్లో ఏడు కొత్త కేసులు నమోదయ్యాయి. తాజాగా విజయనగరం జిల్లాలో రాజేశ్వరి అనే మహిళ స్క్రబ్ టైఫస్ బారినపడి మృతిచెందడంతో పరిస్థితిపై ప్రభుత్వం అప్రమత్తమైంది. ఈ నేపథ్యంలో రాష్ట్ర ముఖ్యమంత్రి చంద్రబాబు రాష్ట్ర సచివాలయంలో మంగళవారం (డిసెంబర్ 2) వైద్యారోగ్య శాఖ అధికారులతో సమీక్ష సమావేశం నిర్వహించారు. రాష్ట్రంలో కేసులు పెరుగుతున్న నేపథ్యంలో ప్రజల్లో అవగాహన పెంపు, ముందస్తు చర్యలు, శీఘ్ర చికిత్స వంటి కీలక అంశాలపై ఆయన దృష్టి సారించారు.
జాగ్రత్తలు పాటించకపోతే ప్రమాదం తప్పదు — సీఎం చంద్రబాబు
విజయనగరం ఘటనను ప్రస్తావించిన సీఎం, ఇలాంటి పరిస్థితులు మళ్లీ ఎక్కడా రాకుండా తక్షణ చర్యలు తీసుకోవాలని ఆదేశించారు. కీటకాలు కుట్టడం వల్ల ఇలాంటి ప్రాణాపాయాలు ఏర్పడకుండా ప్రజలకు సులభంగా అర్థమయ్యేలా అవగాహన కార్యక్రమాలు చేపట్టాలని సూచించారు.
అధికారులు ముఖ్యమంత్రికి ఇచ్చిన వివరాల ప్రకారం, రాజేశ్వరిని చిగ్గర్ మైట్ కుట్టిన తర్వాత చేసిన ర్యాపిడ్ టెస్ట్లో స్క్రబ్ టైఫస్ పాజిటివ్గా తేలింది. ఈ వ్యాధి అంటువ్యాధి కాదని, అయితే కీటకం కుడితే శరీరంపై దద్దుర్లు, పుండ్లు ఏర్పడటంతో పాటు అధిక జ్వరం, చలి, తీవ్ర తలనొప్పి, కండరాల నొప్పులు వంటి లక్షణాలు కనిపిస్తాయని తెలిపారు. సమయానికి చికిత్స అందిస్తే ప్రమాదం ఉండదని వైద్య నిపుణులు స్పష్టం చేశారు.
ప్రభుత్వం సూచించిన ముఖ్య జాగ్రత్తలు
స్క్రబ్ టైఫస్ను నివారించాలంటే లార్వల్ మైట్స్ దగ్గరకు రానీయకుండా చర్యలు తీసుకోవాలని ప్రభుత్వం సూచిస్తోంది. ముఖ్యంగా ప్రభావిత ప్రాంతాల్లో నివసించే ప్రజలు ఈ క్రింది సూచనలు తప్పనిసరిగా పాటించాలని సూచించారు:
ఇంటి చుట్టుపక్కల చెత్త పేరుకుపోకుండా పరిశుభ్రత పాటించాలి
ఇంటిలో తడి వాతావరణం ఉండకుండా పొడిగా ఉంచాలి
తడిసిన దుస్తులను ధరించకూడదు
చేతులు, కాళ్లు పూర్తిగా కప్పే దుస్తులు వేసుకోవాలి
పొలాల్లో పనిచేసేటప్పుడు మరింత జాగ్రత్త
ఎక్కడైనా పురుగు కుట్టినట్లు అనిపిస్తే వెంటనే వైద్యులను సంప్రదించాలి
నిర్లక్ష్యం ప్రమాదానికి దారితీసే అవకాశం ఉన్నప్పటికీ, అవసరమైన జాగ్రత్తలు తీసుకుంటే భయపడాల్సిన అవసరం లేదని నిపుణులు తెలిపారు. ప్రభావిత ప్రాంతాల్లో అవగాహన కార్యక్రమాలు వేగంగా చేపట్టాలని సీఎం చంద్రబాబు అధికారులకు స్పష్టమైన ఆదేశాలు జారీ చేశారు ఉత్తరాంధ్రలో స్క్రబ్ టైఫస్ ప్రభావం పెరుగుతున్న నేపథ్యంలో ప్రభుత్వం అప్రమత్తంగా మారి ముందస్తు చర్యల్లో నిమగ్నమైంది. ప్రజలు కూడా తగిన జాగ్రత్తలు తీసుకుంటే ఈ వ్యాధిని పూర్తిగా నిరోధించవచ్చని వైద్యులు చెబుతున్నారు.
