శ్రీశైలం: ద్వాదశ జ్యోతిర్లింగాలలో ఒకటైన శ్రీశైలం క్షేత్రంలో భక్తులు భారీ స్థాయిలో సైబర్ మోసాలకు గురవుతున్నారు. దేవస్థానం, ఏపీ టూరిజం వసతి గదుల పేరుతో నకిలీ వెబ్సైట్లు, ఫేక్ యాప్లు సృష్టించి సైబర్ కేటుగాళ్లు వేల రూపాయలు లాగేస్తున్నారు. తాజాగా జరిగిన కొన్ని ఘటనలు భక్తుల్లో తీవ్ర ఆందోళనకు గురిచేస్తున్నాయి.
జస్ట్ డయల్ పేరుతో మోసం
దేవస్థానం వసతి గదుల ఫొటోలతో నకిలీ పోస్టులు జస్ట్ డయల్ యాప్లో పెట్టి, ‘రూములు లభించును’ అంటూ ప్రకటనలు పెడుతున్నారు. ఒక మొబైల్ నంబర్ను ఇచ్చి, ఆ నంబర్కు కాల్ చేయమని సూచిస్తూ భక్తులను వలలోకి దింపుతున్నారు. గంగా-గౌరీ సదన్, మల్లికార్జున సదన్, పాతాళేశ్వర సదన్ ఫొటోలతో ఫేక్ ఐడీలను సృష్టించి నమ్మదగినట్టుగా చూపిస్తున్నారు.
ఏపీ టూరిజం పేరుతో నకిలీ వెబ్సైట్
హరిత గెస్ట్ హౌస్లో రూములు బుక్ చేసుకున్నట్లు భావించి, బెంగళూరుకు చెందిన ఒక ఆర్మీ ఆఫీసర్ సుమారు ₹30,000 ఆన్లైన్ పేమెంట్ చేసి శ్రీశైలానికి చేరుకున్నారు. కౌంటర్ వద్ద రశీదు చూపించగా, అది నకిలీ వెబ్సైట్ అని తెలిసి ఆయన షాక్కు గురయ్యారు. ఇలాంటి కేసులు తరచూ జరుగుతున్నప్పటికీ, కేటుగాళ్లను అధికారులు గుర్తించలేకపోతున్నారు.
ఓలలాడుతున్న భక్తులు
ప్రతిరోజూ తెలుగు రాష్ట్రాలు, దేశం నలుమూలల నుంచి వేలాది మంది భక్తులు వచ్చే శ్రీశైలం క్షేత్రంలో ఈ సైబర్ మోసాలు పెద్ద సమస్యగా మారాయి. నకిలీ వెబ్సైట్లు, యాప్లతో భక్తులు మోసపోతూ, అక్కడికి వెళ్లిన తర్వాత గదులు దొరకక తీవ్ర ఇబ్బందులు పడుతున్నారు.
అధికారుల గోడు
శ్రీశైలం దేవస్థానం, ఏపీ టూరిజం పేరుతో జరుగుతున్న ఈ మోసాలు సోషల్ మీడియాలో వైరల్ కావడంతో చర్చనీయాంశమయ్యాయి. అయినప్పటికీ, నకిలీ వెబ్సైట్లను గుర్తించి అడ్డుకునే చర్యల్లో అధికారులు విఫలమవుతున్నట్టు భక్తులు విమర్శిస్తున్నారు. కేటుగాళ్లు రూపొందిస్తున్న నకిలీ ఫోటోలు, ఐడీల వల్ల భక్తులను ఎలా కాపాడాలోనని అధికారులు తలలు పట్టుకుంటున్నారు.
భక్తులకు అప్రమత్తత సూచనలు
అధికారిక వెబ్సైట్లు, యాప్ల ద్వారానే బుకింగ్ చేయాలి
అనుమానాస్పద లింకులు, నంబర్లు నమ్మకూడదు
చెల్లింపులు చేసే ముందు వెబ్సైట్ నిజస్వరూపం ధృవీకరించాలి
జస్ట్ డయల్ లేదా ఇతర యాప్లలో వచ్చిన ప్రకటనలను విషయం తెలుసుకోకుండా విశ్వసించకూడదు
శ్రీశైలం వంటి పవిత్ర క్షేత్రంలో సైబర్ మోసాలు పెరగడం భక్తులకు ఆందోళన కలిగిస్తోంది. నకిలీ సైట్లపై కఠిన చర్యలు తీసుకుని భక్తుల భద్రతకు ప్రాధాన్యత ఇవ్వాలని కోరుతున్నారు.
